މޯލްޑިވިއަން އިން "އެކްސް" ގައި ކޮށްފައިވާ ޕޯސްޓެއްގައި ބުނެފައިވަނީ، އެތެރޭގެ އުދުހުންތަކަށް ހާއްސަކޮށްގެން މިހާރު ނުލިބޭ ބައެއް އާ ޚިދުމަތްތަކާއި އެކު "ޕްރިމިއަމް އިކޮނޮމީ" ކްލާހުގެ ޓިކެޓްތައް ވިއްކަން ފަށާފައިވާކަމަށެވެ. މޯލްޑިވިއަން ގެ ފްލީޓުގައި ހިމެނޭ އޭޓީއާރުތަކާއި ޑޭޝް ގެ ބޯޓުތަކުން މީގެކުރިން ވިއްކަމުން ދިޔައީ އިކޮނޮމީ ކްލާސް ޓިކެޓު އެކަންޏެވެ.

މޯލްޑިވިއަން އިން އަލަށް ތަޢާރަފްކުރި "ޕްރިމިއަމް އިކޮނޮމީ" ކްލާހުގެ ޓިކެޓްތަކުގެ އަގުތައް މިހާރު ލިބޭ އިކޮނޮމީ ކްލާހުގެ ޓިކެޓްތަކަށް ވުރެން ބޮޑުވާނެކަމަށް ވެސް މޯލްޑިވިއަން އިން ވަނީ ބުނެފައެވެ. އަދި، ޕްރިމިއަމް އިކޮނޮމީ ކްލާހުގެ ޓިކެޓާއެކު ބެގެޖް އެލަވެންސް 25 ކިލޯއަށް އިތުރުވެގެން ދާނެކަމަށާއި، ޓިކެޓް ނެގުމަށްފަހު، އެއް ފަހަރު ހިލޭ ދަތުރު ކުރާ ތާރީހު ބަދަލު ކުރުމުގެ ފުރުސަތު ލިބިގެންދާނެ ކަމަށް ވެސް މޯލްޑިވިއަން އިން ވަނީ ފާހަގަކުރައްވާފައެވެ.

މީގެ އިތުރުން، އެއާޕޯޓުންވެސް މި ފަސެންޖަރުންނަށް ރަނގަޅު ފެންވަރެއްގެ ހިދުމަތްތަކެއް ލިބިގެންދާނެކަމަށް ވެސް މޯލްޑިވިއަން އިން ވަނީ ބުނެފައެވެ. އޭގެ ތެރޭގައި ޕްރިއޯރިޓީ ޗެކިންގ-ސާވިސް އާއި ހާއްސަ ލޯންޗު ޚިދުމަތްތަކުގެ އިތުރުން، ޕްރިއޯރިޓީ ބޯޑިންގ ހިދުމަތާއި، ޙައްސަ ގޮނޑިބަރިއެއްގެ މި ފަސެންޖަރުންނަށް ލިބިގެންދާނެއެވެ. ހަމައެހެންމެ، ޕްރިމިއަމް އިކޮނޮމީ ކްލާހުގެ ފަސެންޖަރުންނަށް ހިލޭ ސްނެކާއި ބުއިމެއް ލިބިގެން ދާނެކަމަށްވެސް މޯލްޑިވިއަން އިން ވަނީ ފާހަގަކުރައްވާފައެވެ.

"ޕްރިމިއަމް އިކޮނޮމީ" ކްލާހުގެ ޓްކިޓްތައް ގަންނަން ލިބޭނީ އޭޕްރީލް 13، އިން ފެށިގެން ކުރާ ދަތުރުތަކަށް ކަމަށާއި، މި ކްލާހުގެ ޓިކެޓުތައް މިހާރު މޯލްޑިވިއަންގެ ވެބްސައިޓުން ފެންނަން ހުންނާނެކަމަށް މޯލްޑިވިއަން އިން ވަނީ ބުނެފައެވެ.