ސާންތީ ނިޔާވުމާއި ގުޅިގެން ރައީސްވަނީ މިއަދު ސާންތީގެ އާއިލާއަށް ތަޢުޒިޔާ ފޮނުއްވާފައެވެ. އެގޮތުން ސޯޝަލް މީޑިއާގައި ރައީސް ކުރެއްވި ޕޯސްޓެއްގައި ވިދާޅުވެފައިވަނީ، ކުޅިވަރުގެ ރޮނގުން، ވަކީން ޚާއްޞަކޮށް ފުޓްބޯޅައިގައި ބައިނަލްއަޤްވާނީ އަދި ޤައުމީ ފެންވަރުގައިވެސް ދިވެހިރާއްޖެ ފަޙުރުވެރިވާ ޚިދުތްތަކެއް އިޙްސާން ޢަބްދުލްޣަނީ ކޮށްދެއްވާފައިވާކަމަށެވެ.

ރާއްޖޭގެ ފުޓްބޯޅައަށް ގިނަ ގުނަ ޚިދުމަތްތަކެއް ކޮށްދެއްވާފައިވާ ޢިހްސާން އަބްދުލްޣަނީ (ސާންތީ) ނިޔާވެފައިވަނީ ރޭގެ ވަގުތެއްގައި ޓްރީ ޓޮޕް ހޮސްޕިޓަލުގައެވެ. ސާންތީ ނިޔާވިއިރު ގެންދެވީ ކެންސަރު ބައްޔަށް ފަރުވާ ހޯދަމުންނެވެ.

ސާންތީ ވަނީ 2001 ވަނަ އަހަރުން ފެށިގެން 2008 ވަނަ އަހަރާއި ހަމައަށް ޤައުމީ ޓީމުގެ އެސިސްޓެންޓް ކޯޗެއްގެ ގޮތުގައި މަސައްކަތް ކުރައްވާފައެވެ. އެހެންކަމުން، ރާއްޖެއިން އެންމެ ފުރަތަމަ ސާފް ޗެމްޕިއަންޝީޕްގެ ތަށި ކާމިޔާބުކުރިއިރު ސާންތީ ހުންނެވީ ޤައުމީޓީމުގެ އެސިސްޓެންޓް ކޯޗުގެ މަޤާމުގައެވެ.

އަދި 2008 ވަނަ އަހަރުގެ ފަހުން ސާންތީ ވަނީ ކުލަބު ފުޓްބޯޅައިގެ ސީނިއާ ކޯޗެއްގެ ގޮތުގައި މަސައްކަތްކުރައްވާފައެވެ. މިގޮތުން ސާންތީ ވަނީ ކުލަބު އީގަލްސްއާއި ޔުނައިޓެޑް ވިކްޓަރީއަށް ކޯޗުކޮށްދީފައެވެ. އެގޮތުން، 2019 ވަނަ އަހަރު ސާންތީ ވަނީ ކުލަބު އީގަލްސް އަށް ދިވެހި ޕްރިމިއާ ލީގުގެ ދެ ވަނަ ހޯދައިދީފަ އެވެ.

ސާންތީ ވަނީ ފުޓްބޯލް އެސޯސިއޭޝަން އޮފް މޯލްޑިވްސް (އެފްއޭއެމް) ގެ ޓެކްނިކަލް ޑައިރެކްޓަރުކަން ވެސް ކޮށްފަ އެވެ. ސާންތީ ދިވެހި ފުޓުބޯޅަ ދާއިރާ އަށް ކޮށްދެއްވާފައިވާ ގިނަ ގުނަ ޚިދުމަތްތަކުގެ އަގުވަޒަންކުރުމުގެ ގޮތުން އޭނާއަށް ވަނީ ކުޅިވަރަށް ޚިދުމަތް ކުރުމުގެ ދާއިރާއިން ޒުވާނުންގެ ޤައުމީ އިނާމް ވެސް ލިބިލައްވާފައެވެ.

ސާންތީގެ ޖަނާޒާ ބޭއްވުމަށް ހަމަޖެހިފައިވަނީ މިއަދު މެންދުރު ނަމާދަށްފަހު އިސްލާމީ މަރުކަޒުގައެވެ. ފަސްތާނުލުމަށް ހަމަޖެހިފައިވަނީ އާސަހަރާގައެވެ. އަޅުގަނޑުމެންގެ ދުޢާއަކީ ސާންތީގެ ފުރާނައަށް މާތް ﷲ ސުވަރުގޭގެ ދާއިމީ ނިޢުމަތް މިންވަރުކޮށްދެއްވާ އާއިލާއަށް ކެތްތެރިކަން ދެއްވުމެވެ.