ތެލިސީމިއާ ސެންޓަރުން ފޯރުކޮށްދޭ ބައެއް ޚިދުމަތްތަކާއި ގުޅިގެން ތެލެސީމިއާ ޕޭޝަންޓުންގެ އާއިލާތަކުން ވަނީ ކަނބޮޑުވުންތައް ފާޅުކޮށް ރޭގެ ވަގުތެއްގައި މޯލްޑިވްސް ބްލަޑް ސާވިސް (އެމްބީއެސް) ބޭރުގައި އިހުތިޖާޖު ކޮށްފައެވެ. މިއާއި ގުޅިގެން ރައީސުލްޖުމްހޫރިއްޔާ ޑރ.މުޙައްމަދު މުޢިއްޒު ވަނީ މިއަދު ހެނދުނު ނެޝަނަލް ތެލަސީމިއާ ސެންޓަރަށް ޒިޔާރަތްކުރައްވައި، އެތަނުގެ ހާލަތު ބައްލަވައިލައްވާފައެވެ.

ރައީސްގެ މިޒިޔާރަތުގައި އެމަނިކުފާނުވަނީ އެވަގުތު ތެލަސީމިއާ ސެންޓަރުގައި ތިއްބެވި ޕޭޝަންޓުންނާއި ބައްދަލުކުރައްވައި، އެފަރާތްތަކުގެ ކަންބޮޑުވުންތައްވެސް އަޑުއައްސަވާފައެވެ. އަދި މި ކަންބޮޑުވުންތަކަށް އެދެވޭ އަވަސް ޙައްލެއް ހޯދައިދެއްވުމަށް އެމަނިކުފާނަށް ކުރެވެން ހުރިކަންކަން އޮޅުންފިލުއްވައި ސަރުކާރުން އެކަންކަމަށް ޙައްލު ހޯދުމަށް މަސައްކަތް ކުރައްވާނެ ކަމުގެ ޔަޤީންކަން ވެސް ދެއްވާފައެވެ.

މީގެ އިތުރުން ރައީސް ވަނީ އެތަނުގެ މުވައްޒަފުންނާއި ބައްދަލުކުރައްވައި ތަނުގެ ހާލަތު ވެސް ބައްލަވައިލައްވާފައެވެ. އަދި ކަމާގުޅޭ އިދާރާތަކުގެ އިސްވެރިންނަށް އެތަނުގެ ފެންވަރު ރަނގަޅުކުރުމަށް މިހާރުން މިހާރަށް އެޅަންޖެހޭ ފިޔަވަޅުތައް ވީ އެންމެ އަވަސްކޮށް އެޅުއްވުމަށް ވެސް ރައީސް ވަނީ އިރުޝާދުދެއްވާފައެވެ.

މިގޮތުން، 2017 ވަނަ އަހަރުން ފެށިގެން ތެލެސީމިއާ ސެންޓަރ ހިންގަމުން އަންނަނީ ޑިރެކްޓަރ ޖެނެރަލްއެއް ނެތިކަން ފާހަގަކުރައްވަމުން ރައީސް ވިދާޅުވީ، އެކަން ވަގުތުން ހައްލުކުރުމަށް ދަންނަވާފައިވާނެކަމަށެވެ. އަދި އަދި މި ސެންޓަރުގައި ނަރުހުންގެ ދަތިކަން ހުރުމުން، ނަރުހުން ހޯދޭނެގޮތާއި، ސީނިއަރ ފިޒީޝަނެއް ހަމަޖެއްސުމާއި، ތަނަށް ބޭނުންވާނެ ވަސީލަތްތަކާއި އެކިކަހަލަ އާލާތްތައް ހޯދޭނެގޮތާއި، ލެބޯޓްރީގައި ބޭނުންވާނެ ވަސީލަތްތަކާއި މުވައްޒަފުން ވަގުތުން ހޯދުމަށް ހަމަޖައްސާފައި ވާނެކަމަށް ވެސް ރައީސްވަނީ ވިދާޅުވެފައެވެ.

ހަމައެހެންމެ، މި ސެންޓަރުގެ ޚިދުމަތް ފޯރުކޮށްދޭގޮތް،  އައިޖީއެމްއެޗްގައި ޚިދުމަތް ފޯރުކޮށްދޭ ދުވަސްތަކާއި ގަޑިތަކާއި އެއްގޮތަށް އިތުރުކުރުމަށް ނިންމާފައިވާކަމަށް ވެސް ރައީސްވަނީ ވިދާޅުފެވައެވެ. މި ގޮތުން، މި ގަޑިތަކުގައި ޚިދުމަތް ފޯރުކޮށްދެއްވުމަށް ބޭނުންވާނެ ހިއުމަން ރިސޯސް އިތުރުކުރުމަށް ވެސް ރައީސް ވަނީ ދަންނަވާފައެވެ.

ތެލެސީމިއާ ސެންޓަރަށް ރައީސް ކުރެއްވި ޒިޔާރަތުގައި އެމަނިކުފާނާއި އެކު މާލީ ވަޒީރު، މޫސާ ޒަމީރުވެސް ދުރުވިއެވެ. އަދި އެ ސެންޓަރަށް ކުރިމަތިވެފައިވާ މައްސަލަތައް ހައްލުކުރެއްވުމަށް ފައިސާގެ ދަތިކަމެއް ނޯންނާނެކަމަށް ޒަމީރު ވަނީ ވިދާޅުވެފައެވެ.

މި ޒިޔާރަތުގައި ރައީސް ވަނީ ތެލެސީމިއާ ސެންޓަރުގެ ކަންކަން އޮތްގޮތް އެއްވެސް ވަރަކަށް ނޭނގޭކަމަށް ވިދާޅުވެފައެވެ. އަދި ތެލިސީމިއާގެ ކަންކަމުގައި އުޅޭ ފަރާތްތަކުން ބައްލަކޮށްފައިވީނަމަވެސް، އެ ސެންޓަރަށް އަމަލީ ސިފައެއް އައިސްފައިނުވާކަން ފާހަގަކުރައްވައި ރައީސް ވިދާޅުވެފައިވަނީ ކުރިއަށް އޮތް ދުވަސްތަކުގައި އިންޓާނަލީ ގެންނަންޖެހޭ ބަދަލުތަށް ގެނެސް އެތަނުގައި ދޭ ޚިދުމަތްތަށް ރަނގަޅުކުރުމަށް ނިންމާފައިވާކަމަށެވެ.

ރައީސް ވަނީ ހުޅުމާލޭގައި ތައްޔާރުކުރަމުންދާ ތެލެސީމިއާ ސެންޓަރުގެ މަސައްކަތްތައް ވެސް މިއަދު ބައްލަވާލައްވާފައެވެ. އަދި އޮރެންޖު ހިޔާގެ ނަމުގައި ޢިމާރާތްކުރާ އެތަނުގެ މަސައްކަތްވެސް އަވަސްކުރުމަށް އަންގަވާފައިވާނެކަމަށް ރައީސް ވިދާޅުވިއެވެ. އެ ޢިމާރަތަކީ ވަރަށް ޖާގަ ތަނަވަސް އަދި ހުރިހާ ވަސީލަތެއް ފުރިހަމަ ތަނެއްކަމަށްވެސް ރައީސް ވިދާޅުވިއެވެ.

މި ޒިޔާރަތުގައި، ރައީސް އިރުޝާދު ދެއްވާފައިވަނީ އާ އިމާރާތަށް ތެލަސީމިއާގެ ޚިދުމަތްތައް ބަދަލުކުރެއްވި ނަމަވެސް، ޚިދުމަތް ހޯދާ ފަރާތްތަކަށް އެއްވެސް ދައްޗެއްނެތި ޚިދުމަތް ދެވޭނެގޮތަށް، އާ އިމާރާތަށް ބަދަލުކުރެއްވުމުގެ މަސައްކަތް ކުރެއްވުމަށެވެ. މީގެ އިތުރުން ޚިދުމަތް ހޯދާ ފަރާތްތަކަށް ކަންކަން ފަހިވާނެ ގޮތަށް، ބަލި މީހުންނާ އަދި ޚިދުމަތް ހޯދާފަރާތްތަކާ ގުޅިގެން އެފަރާތްތަކުގެ މަޝްވަރާއާއެކު، ގާތުން ކަންކަން ކުރިއަށް ގެންދިއުމަށްވެސް އެމަނިކުފާނު އިރުޝާދު ދެއްވިއެވެ.