ވަޒީރު މިފަދައިން ވިދާޅުވެފައިވަނީ ށ.މިލަންދޫ އިސްލާމީ މަރުކަޒު އިމާރާތްކުރުމުގެ މަސައްކަތް ހަވާލުކުރުމަށް ބޭއްވުނު ރަސްމިއްޔާތުގައެވެ. ށ. މިލަންދޫ އިސްލާމީ މަރުކަޒު އިމާރާތްކުރުމުގެ މަސައްކަތް ހަވާލުކޮށްފައިވަނީ މޯލްޑިވްސް ޓްރާންސްޕޯޓް އެންޑް ކޮންޓްރެކްޓިން ކޮންޕެނީ، އެމްޓީސީސީ އާއެވެ.

މިގޮތުން، މި އެއްބަސްވުމުގައި އިސްލާމީ ކަންތައްތަކާ ބެހޭ ވުޒާރާގެ ފަރާތުން ސޮއިކުރައްވާފައިވަނީ ވަޒީރު ޑރ. މުޙައްމަދު ޝަހީމް ޢަލީ ސަޢީދެވެ. އަދި އެމްޓީސީސީގެ ފަރާތުން މި އެއްބަސްވުމުގައި ސޮއިކުރައްވާފައިވަނީ އެކުންފުނީގެ މެނޭޖިންގ ޑިރެކްޓަރ އަޙްމަދު ސަޢުދީ އެވެ.

މިލަންދޫގައި އިމާރާތްކުރާ އިސްލާމީ މަރުކަޒުގެ މަސައްކަތް ވަރަށް އަވަހަށް ނިންމާލެވޭނެކަމުގެ އުންމީދުކުރައްވާކަމަށް ފާހަގަކުރައްވައި ޑރ ޝަހީމް ވިދާޅުވެފައިވަނީ، މިލަންދޫގައި ޤާއިމުކުރާ އިސްލާމީ މަރުކަޒަކީ އިސްލާމީ މުހިންމު މަރުކަޒަކަށް ވެގެންދާނެކަމަށެވެ. އެގޮތުން، އެ މަރުކަޒުގައި އިސްލާމީ ތަޢުލީމު ވެސް ފޯރުކޮށްދޭނެކަމަށް ވަޒީރު ވަނީ ވިދާޅުވެފައެވެ.

މިއާއި ގުޅިގެން އެމްޓީސީސީ ގެ މެނޭޖިންގ ޑިރެޖްޓަ ސަޢުދީ ވިދާޅުވެފައިވަނީ، މިލަންދޫގައި އިމާރާތްކުރާ އިސްލާމީ މަރުކަޒުގެ މަސައްކަތަށް ޚާއްސަ ސަމާލުކަމެއް ދީގެން އެކުންފުނީގެ ކެޕޭސިޓީ އިތުރުކޮށް މަސައްކަތް ކުރިއަންގެންދާނެކަމަށެވެ. އަދި ދިގު މުއްދަތަކަށް މަރުކަޒު ބޭނުންކުރެވޭނެ ފެންވަރަށް ކޮންޓްރެކްޓްގައި ދީފައިވާ މުއްދަތަށް މަސައްކަތް ނިންމުމަށް މަސައްކަތްކުރައްވާނެ ކަމަށް ވެސް ސަޢުދީ ވަނީ ވިދާޅުވެފައެވެ.

ރަށްރަށުގައި އިސްލާމީ މަރުކަޒުތައް ޤާއިމުކުރެވިފައި ހުރިނަމަވެސް އެތަންތަނުގެ ބޭނުން އެންމެ ފުރިހަމަ ގޮތުގައި ނުހިފޭކަމަށް ވަޒީރު ޑރ. ޝަހީމް ވަނީ މި ރަސްމިއްޔާތުގައި އަލިއަޅުވާލައްވާފައެވެ. އެހެންކަމުން، މި ތަންތަނުން ދެވޭ ޚިދުމަތްތަށް އިތުރަށް ފުރިހަމަކުރުމަށް އެވުޒާރާއިން ގިނަ މަސައްކަތްތަކެއް ކުރަމުން ދާކަމަށް ވެސް ވަޒީރުވަނީ ފާހަގަކުރައްވާފައެވެ.

މިގޮތުން، ގދ. ތިނަދޫއާއި، ރ. އުނގޫފާރުގައި ދިވެހިރާއްޖޭގެ އިސްލާމީ ޔުނިވަރސިޓީގެ ކޯސްތައް މި ސަރުކާރު ވެރިކަމާ ހަވާލުވިފަހުން ފަށާފައިވާކަމަށް ވަޒީރު ވަނީ ވިދާޅުވިއެވެ. އަދި މި އަހަރުގެ ތެރޭގައި މިހާތަނަށް ރާއްޖޭގައި ޤާއިމުކޮށްފައިވާ ހުރިހާ އިސްލާމީ މަރުކަޒެއްގައި ލައިބްރަރީތައް ޤާއިމުކުރަން ފެށޭނެކަމަށްވެސް ވަޒީރު ވިދާޅުވިއެވެ. އަދި މިހާރު މަސައްކަތް ހިނގަމުންދާ އިސްލާމީ މަރުކަޒުތަކަށްވެސް އަލިއަޅުވާލައްވައި ވަޒީރު ވިދާޅުވީ އައްޑޫ ސިޓީ އަދި ހއ. ދިއްދޫ އިސްލާމީ މަރުކަޒުތަކުގެ މަސައްކަތް މި އަހަރު ނިންމާލެވޭނެކަމަށެވެ.

އެންމެ ފުރަތަމަ ލައިބްރަރީ ޤާއިމުކުރުމުގެ މަސައްކަތް ކުރަމުން ގެންދަނީ ސަލްމާން ސެންޓަރުގައި ކަމަށާއި އެތަނުގެ މަސައްކަތް ފުރިހަމަކުރުމަށްފަހު މި އަންނަ މަހު ހުޅުވުމަށް މަސައްކަތްކުރަމުން އަންނަކަމަށް ވެސް ވަޒީރުވަނީ ވިދާޅުވެފައެވެ.