އެމްއެންޑީއެފްއާއި، ދިވެހި ފުލުހުންގެ ޚިދުމަތުގެ އިތުރުން ސަރުކާރު ހިއްސާވާ ކުންފުނިތައް ގުޅިގެން މާލޭގެ ބޮޑު ސަރަހައްދެއް ޢީދު ހަވީރަށް ތައްޔާރުކުރަމުން ގެންދާކަމަށް އެމްއެންޑީއެފްއިން މިއަދު ނެރުނު ބަޔާނެއްގައި ވަނީ ބުނެފައެވެ. އެގޮތުން މާލޭގެ ސަލްޓަންޕާކުން ފެށިގެން، އިސްލާމީ މަރުކަޒު މައިދާނާއި، ޖުމްހޫރީ މައިދާނާއި، ރަސްމީ ބޮޑުފާލަމުގައި ވެސް ތިބެވޭގޮތަށް މި ސަރަހައްދުތައް އަންނަނީ ޢީދު ހަވީރަށް ތައްޔާރުކުރަމުންނެވެ.

ޢީދު ހަވީރަށް ޒިޔާރަތްކުރާ ޢާއިލާތަކަށް މި ސަރަހައްދުތަކުގައި ތިބެވޭނެ އިންތިޒާމާއި، ޢީދު އުފަލުގައި ބާއްވާ އެކި ކުޅިވަރުތަކުގައި ބައިވެރިވުމުގެ އިންތިޒާމު ވެސް ހަމަޖެހިފައިވާކަމަށް އެމްއެންޑީއެފް އިން ވަނީ ބުނެފައެވެ. އަދި ޢީދު ހަދިޔާދިނުމާއި، މުނިފޫހިފިލުވުމުގެ ތަފާތު އައިޓަމްތައްވެސް މި ޢީދު ހަވީރުގައި ކުރިއަށްދާ ގޮތަށް ވަނީ ހަމަޖެހިފައެވެ.

އެމްއެމްޑީއެފް އިން ބުނެފައިވަނީ، ޢީދާއި ދިމާކޮށް މި ފަދަ ބޮޑު ހަރަކާތެއް މާލޭގައި އިންތިޒާމްކުރާ އެންމެ ބޮޑު ބޭނުމަކީ، އިސްލާމީ މި މުހިންމު މުނާސަބާގެ އުފަލުގައި ވީހައި ގިނަ ޢާއިލާތަކެއް އެއް ތަނަކުން ބައްދަލުވެ، އިޖުތިމާޢީ ރޫޙު އާލާކުރުން ކަމަށެވެ. އަދި ޚާއްސަގޮތެއްގައި ކުޑަކުދީންނަށް ޢީދުގެ އުފާވެރިކަން އިހްސާސްކޮށްދިނުމަށާއި، އިހުޒަމާނެކޭ އެއްގޮތަށް، ޢިދު ދުވަހު އެއްބަޔަކު އަނެއްބަޔަކާއި ބައްދަލުކޮށް، ސަލާންގަލާންކޮށް، މުނިފޫހިފިލުވައި، ހަދިޔާ ބަދަލުކުރުން ފަދަ ރީތި އާދަތަކަށް ދިރުން ގެނެސްދިނުމަށް ކަމަށް ވެސް އެމްއެންޑީއެފް އިން ވަނީ ފާހަގަކުރައްވާފައެވެ.

ޢިދު ދުވަހުގެ ހަވީރު 4 އިން 6 އަކަށް ކުރިއަށް ދާ މި ޢީދު ހަވީރުގައި، އެކި ފަންނާނުންގެ ހުށަހެޅުންތައް ފެނިގެންދާނެކަމަށާއި، ކުޅިވަރުގެ އިތުރުން، ޚާއްސަ އެކި ފަރާތްތަކާއި ބައްދަލުވުމުގެ ފުރުސަތުވެސް ލިބިގެންދާނެކަމަށް އެމްއެންޑީއެފްއިން ވަނީ ބުނެފައެވެ.

ފިތުރު ޢީދާއި ގުޅިގެން ސަރުކާރުން އަންނަނީ ރާއްޖޭގެ ގިނަ ރަށްތައް ކުލަ ބޮކިން ދިއްލާލުމުގެ ހަރަކާތެއްވެސް ފަށާފައެވެ.