ސުޕްރީމް ކޯޓުގެ ފަނޑިޔާރު އަލްއުސްތާޛު ޙުސައިން ޝަހީދު، ޖުޑީޝަލް ސަރވިސް ކޮމިޝަންގެ މެންބަރުކަމަށް ޢައްޔަންކުރެއްވީ ޖުޑީޝަލް ސަރވިސް ކޮމިޝަނުގެ ޤާނޫނުގެ 3 ވަނަ މާއްދާގެ 2 ވަނަ ނަންބަރުގައި ބަޔާންކޮށްފައިވާ ގޮތުގެމަތިން، ސުޕްރީމްކޯޓުގައި ހިމެނޭ ފަނޑިޔާރުންގެ ތެރެއިން، އެ ކޯޓުން އިންތިޚާބުކުރާ އުއްތަމަފަނޑިޔާރު ފިޔަވައި އެހެން ފަނޑިޔާރެއްގެ ހައިސިއްޔަތުންނެވެ. ސުޕްރީމްކޯޓުގެ ފަނޑިޔާރުގެ މަޤާމަށް އަލްއުސްތާޛު ހުސައިން ޝާހިދު އައްޔަންކުރައްވާފައިވަނީ މި މަހުގެ 19 ވަނަ ދުވަހުއެވެ.

ޖޭއެސްސީއަކީ 10 މެމްބަރުންގެ މައްޗަށް އެކުލެވިފައިވާ ކޮމިޝަނެކެވެ. މިގޮތުން ފަނޑިޔާރު އަލްއުސްތާޛު ހުސައިން ޝާހިދުގެ އިތުރުން މިވަގުތު ޖޭއެސްސީގެ މެމްބަރުންގެ ގޮތުގައި ތިއްބަވަނީ:

· ކޮމިޝަނުގެ ރައީސް އަލްއުސްތާޛު ޙުސައިން ރިޟާ އާދަމް

· ރައްޔިތުންގެ މަޖިލީހުގެ ރައީސް ޢަބްދުއްރަޙީމް ޢަބްދުﷲ

· ހައި ކޯޓުގެ ފަނޑިޔާރު އަލްއުސްތާޛު މުޙައްމަދު ނިޔާޒު

· ދަށު ކޯޓުގެ ފަނޑިޔާރު އަލްއުސްތާޛު ފަރުހާދު ރަޝީދު

· ޢާންމުންގެ ތެރެއިން ރައްޔިތުންގެ މަޖިލީހުން ކަނޑައެޅި މެންބަރު ޑޮކްޓަރ އާމިނަތު އުއްމުކުލްޘޫމާ

· ސިވިލް ސާވިސް ކޮމިޝަނުގެ ރައީސް އަލްފާޟިލް މުޙައްމަދު ނާޞިޙު

· ބަންޑާރަނައިބު އަލްއުސްތާޛު އަޙްމަދު އުޝާމް

· ރައީސުލްޖުމްހޫރިއްޔާގެ ފަރާތުން އައްޔަންކުރާ މެންބަރ ޔަޒްމީދު މުޙައްމަދު

· ޤާނޫނީ ވަކީލުންގެ ތެރެއިން އިންތިޚާބުކޮށްފައިވާ މެންބަރު އަލްއުސްތާޛު ޢަލީ ޢަބްދުއްލަޠީފް

ޖޭއެސްސީގައި ސުޕްރީމް ކޯޓް ތަމްސީލްކުރައްވާ ފަނޑިޔާރަކަށް ކުރިން ހުންނެވީ ފަނޑީޔާރު ހުސްނުއްސުޢޫދު އެވެ. އެހެންނަމަވެސް، އެންޓި ކޮރަޕްޝަން ކޮމިޝަން (އޭސީސީ) އިން ބަލަން ފެށި މައްސަލައަކާ ގުޅިގެން ހުސްނުއްސުޢޫދު ސަސްޕެންޓުކުރުމުން އޭނާ ވަނީ މިދިޔަ މަހު ސުޕްރީމްކޯޓުގެ ފަނޑިޔާރުކަމުގެ މަޤާމުން އިސްތިއުފާދެއްވާފައެވެ.

2023 ވަނަ އަހަރުން ފެށީގެން ހައިކޯޓުގެ އިސް ފަނޑިޔާރުގެ މަޤާމު އަދާކުރައްވާފައިވާ ފަނޑިޔާރު އަލްއުސްތާޛު ހުސައިން ޝާހިދުވަނީ މިޞްރުގެ އަލްއަޒުހަރު ޔުނިވަރސިޓީއާއި ކުއްލިޔަތުލް ދިރާސާތުލް އިސްލާމިއްޔާއިން ޝަރީޢަތާއި ޤާނޫނުގެ ރޮނގުން މަތީ ތަޢުލީމު ޙާޞިލު ކުރެއްވުމަށްފަހު ދިވެހިރާއްޖޭގެ އިސްލާމީ ޔުނިވަރސިޓީން މާސްޓަރ އޮފް އިސްލާމިކް ޖުޑީޝަލް ސައިންސް އެންޑް ޝަރީއާ ޕޮލިސީ ހާސިލް ކުރައްވާފައިވާފައެވެ. އަދި ފަނޑިޔާރު އަލްއުސްތާޛު ޙުސެއިން ޝަހީދު ވަނީ އައްޑު ސިޓީ ފޭދޫ މެޖިސްޓްރޭޓް ކޯޓުގެ މެޖިސްޓްރޭޓްކަމާއި، ނ. ހޮޅުދޫ މެޖިސްޓްރޭޓް ކޯޓުގެ ކޯޓު އިސް މެޖިސްޓްރޭޓްގެ މަގާމުގެ އިތުރުން ކްރިމިނަލް ކޯޓުގެ ޤާޟީކަމުގެ މަގާމު ވެސް އަދާކުރައްވާފައެވެ.