އެމަނިކުފާނު މިހެން ވިދާޅުވީ މިއަދު ފާހަގަކުރާ ބަންގްލަދޭޝްގެ 54 ވަނަ މިނިވަން ދުވަހުގެ މުނާސަބަތުގައި ބަންގްލަދޭޝްގެ ސަރުކާރަށާއި ރައްޔިތުންނަށް ފޮނުއްވި ތަހުނިޔާގެ މެސެޖެއްގަ އެވެ.

އެ ގައުމުގެ ރައީސް މުހައްމަދު ޝަހާބުއްދީނަށާއި، ވަގުތީ ޗީފް އެޑްވަޒައިރު ޑރ. މުހައްމަދު ޔޫނުސްއަށާއި އެ ގައުމުގެ ސަރުކާރަށާއި ރައްޔިތުންނަށް ތަހުނިއްޔާ ފޮނުއްވި މެސެޖުގައި ރައީސް މުއިއްޒު ވިދާޅުވީ ދެ ގައުމުގެ ދެމެދުގައި އޮތް އެކުވެރި ގުޅުން އިތުރަށް ބަދަހިވެ، އެކި ދާއިރާތަކުން އެއްބާރުލުން ދީގެން ދެ ގައުމަށް ފައިދާ ކުރާނެ ކަމަށް ގަބޫލުކުރައްވާ ކަމަށެވެ.

އަދި މި ގުޅުން ބިނާވެފައި ވަނީ އެއްބައިވަންތަ އަސާސްތަކެއްގެ މައްޗަށް ކަމަށާއި، ސަރަހައްދީ ސުލްހައާއި އިހުތިރާމާއި އެއްބާރުލުން ދިނުމަށް އެންމެން ގުޅިގެން ކުރާ މަސައްކަތުގެ މައްޗަށްކަން ވެސް އެމަނިކުފާނު ފާހަގަކުރެއްވި އެވެ.

"ރާއްޖެއާއި ބަންގްލަދޭޝްއާ ދެމެދު އޮތް ގާތް އަދި އިހުލާސްތެރި ގުޅުން އިތުރަށް ބަދަހިވަނީ ސަރަހައްދީ ސުލްހަ އާއި ފަރުދީ ފެންވަރުގެ އެއްބާރުލުން ކުރިއެރުވުމުގައި ދެޤައުމުގެ މެދުގައި އޮތް އެއްބައިވަންތަކަމުގެ ސަބަބުން،" ރައީސް މުއިއްޒު ވިދާޅުވިއެވެ.

ދިވެހިރާއްޖެއާއި ބަންގްލަދޭޝްއާ ދެމެދު ޒަމާނުއްސުރެ ޑިޕްލޮމެޓިކް އަދި ލޭބަރ ގުޅުން ބަދަހިވެފައިވާއިރު، ދެޤައުމުގެ ދެމެދުގައި ޞިއްޙީ، ތަޢުލީމީ، ވިޔަފާރީގެ ދާއިރާއާއި، މަސައްކަތުގެ ދާއިރާގައި ގުޅުން ބަދަހިވެގެން ދެއެވެ.

ބަންގްލަދޭޝް އަށް މިނިވަންކަން ލިބުނީ 1971 ވަނަ އަހަރުގެ މާޗް މަހުގެ 26 ވަނަ ދުވަހު ތާރީހީ މިނިވަންކަމުގެ ހަރަކާތަކަށް ފަހު އެވެ.