އެންޑީއޭއިން މިފަދައިން ބުނެފައިވަނީ، ޕީއެސްއެމް ނިއުސްގެ ރާއްޖެ މިއަދު ޕްރޮގްރާމްގައި ވާހަކަދައްކަވަމުން، އެންޑީއޭގެ އެކްޓިން ސީއީއޯ މުޙައްމަދު ރާޝިދުއެވެ. މިގޮތުން، ރަޝީދު ވިދާޅުވެފައިވަނީ، ހިންމަފުށީ ރިހިބިލިޓޭޝަން ސެންޓަރުގެ ޖާގަ 500 މީހުންނަށް އިތުރުކުރުމުގެ މަސައްކަތް މިހާރު ކުރިއަށްދާކަމަށެވެ.

މިގޮތުން 450 ޖާގައަކީ ފަރުވާއަށް ބޭނުންވާ ކުދިންނަށް ޚާއްސަކުރެވިފައިވާ ޖާގަކަމަށާއި، ބާކީ 50 ޖާގަ ޚާއްސަކުރަނީ ޑުއަލް ޑައިގްނޯސިސް ނުވަތަ ޚާއްސަ އެހީއަށް ބޭނުންވާ ކުދިންނަށް ކަމަށް ރަޝީދު ވަނީ ވިދާޅުވެފައެވެ. އަދި މި މަސައްކަތްތައް ކުރިއަށް ދަނީ ދާޚިލީ ވުޒާރާގެ ބަޖެޓުގެ ތެރެއިން ކަމަށް ވެސް ރަޝީދު ވަނީ ފާހަގަކުރައްވާފައެވެ.

މަސްތުވާތަކެތި ބޭނުންކުރާ މީހުންނަށް ފަރުވާދިނުމަށް ޤާއިމް ކުރެވިފައިވާ މަރުކަޒުތަކުގައި ޖާގައިގެ ދަތިކަން ކުރިމަތިވާކަން ފާހަގަކުރައްވައި ރަޝީދު ވިދާޅުވެފައިވަނީ ރީހެބިލިޓޭޝަން ސެންޓަރުތައް މަރާމާތުކޮށް ފަރުވާ ދެވޭނެ ޖާގަ އިތުރުކުރުމަށްޓަކައި މި ސަރުކާރު ވެރިކަމާ ހަވާލުވެ ގިނަ މަސައްކަތްތަކެއް ފަށާފައިވާކަމަށެވެ. އެގޮތުން، ހިންމަފުށީ ރިހެބިލިޓޭޝަން ސެންޓަރުގައި މިހާރު ފަރުވާދެވެނީ 200 މީހުންނަކަމަށާއި، މިހާރު އިތުރު 500 މީހުންގެ ޖާގަ އިތުރުކުރުމުގެ މަސައްކަތް ފަށާފައިވާކަމަށް ރާޝިދު ވިދާޅުވިއެވެ. އަދި މި ދައުރުގެ ތެރޭގައި މިހާރު ޖާގަ ހުރި މިންވަރަށްވުރެ 1000މީހުންގެ ޖާގައަށް އިތުރުކުރެވޭނެކަމަށްވެސް އޭނާ ވިދާޅުވިއެވެ.

ހިންމަފުށީގައި ހުންނަ ޑްރަގް ޓްރީޓްމެންޓް އެންޑް ރިހެބިލިޓޭޝަން ސެންޓަރަކީ މަސްތުވާތަކެތީގެ ވަބާގައި ޖެހިފައި ތިބި ޒުވާނުން އަލުން އަނބުރާ މުޖުތަމަޢަށް ނެރުމުގެ މަޤްސަދުގައި، 1997 ވަނަ އަހަރު، ޖޫން މަހުގެ 26 ވަނަ ދުވަހު، ދިވެހި ސަރުކާރުން ހުޅުވި ސެންޓަރެކެވެ. ރީހެބިލިޓޭޝަން ފަރުވާއަށް ބޭނުންވާ އެތައް ބަޔަކު މުޖްތަމަޢުގައި ތިބިކަމަށާއި، މީގެ ކުރިން މަސްތުވާތަކެތީގެ ފަރުވާދޭ މަރުކަޒުތައް އިތުރުކޮށް އެތަންތަނުގެ ޚިދުމަތުގެ ފެންވަރު ރަނގަޅުކުރުމަށް މަސައްކަތްތައް ކުރެވިފައި ނުވާކަމަށް ވެސް ރަޝީދު ވަނީ ފާހަގަކުރައްވާފައެވެ.