ރާއްޖެ ގަޑިން ހެނދުނު 10:30 ހާއިރު އައި މި ބިންހެލުމުގެ ސަބަބުން  ތައިލެންޑާއި މިޔަންމާގެ ބައެއް ސަރަހައްދުތަކަށް ވަނީ ކުއްލި ނުރައްކަލުގެ ހާލަތު އިއުލާނުކޮށްފައެވެ. ތައިލޭންޑާއި މިޔަންމާގެ އުތުރުގެ ބައެއް ސަރަހައްދުތަކަށް ބިންހެލުންތައް އިހުސާސްކުރެވުމާ ގުޅިގެން ރާއްޖެއިން ބޭރުގައި ތިބި ދިވެހި އާއިލާތަކުގެ މެދުގައި ވަނީ ކަންބޮޑުވުން އުފެދިފަ އެވެ.

ތައިލެންޑްގައި ހުންނަ ރާއްޖޭގެ އެމްބަސީން އަންނަނީ އެކަން ވަރަށް ގާތުން ބަލަމުންނެވެ. ރާއްޖެއިން ތައިލެންޑަށް ކަނޑައަޅުއްވާފައި ހުންނަވާ ސަފީރު ފުއާދު ތައުފީގު ވިދާޅުވީ މިހާތަނަށް އެ ސަރަހައްދުގައި ތިބި ދިވެހިންގެ ތެރެއިން އެއްވެސް މީހަކަށް ގެއްލުމެއް ލިބުނު ކަމުގެ މައުލޫމާތެއް ލިބިފައި ނުވާ ކަމަށެވެ.

"އެމްބަސީގައި ގާތްގަނޑަކަށް 150 އެއްހާ ދިވެހިން ރަޖިސްޓްރީކޮށްފައި އެބަތިބި. އެ ހުރިހާ ބޭފުޅުންނާ ވެސް ގުޅައިގެން އެ މީހުންގެ ސަލާމަތާއި ރައްކާތެރިކަން ކަށަވަރު ކުރަމުން މިދަނީ،" ސަފީރު ފުއާދު ވިދާޅުވި އެވެ. އަދި ގިނަ ބަޔަކު ބޭސްފަރުވާއާއި ވިޔަފާރީގެ ބޭނުމަށް ދަތުރުކުރާތީ މިވަގުތު ތައިލެންޑްގައި ތިބި ދިވެހިންގެ އަދަދު އިތުރުވެދާނެ ކަމަށް އޭނާ ވިދާޅުވިއެވެ.

ލިބޭ ގެއްލުމާއި ވަސީލަތްތައް މަދުވުމުގެ ސަބަބުން މުވާސަލާތީ ގޮތުން ބޮޑެތި ގޮންޖެހުންތަކެއް ކުރިމަތިވެފައިވާ މިޔަންމާގައި މިވަގުތު އެއްވެސް ދިވެއްސަކު ތިބިތޯ ބެލުމަށް ޑިޕްލޮމެޓިކް ޗެނަލްތައް މެދުވެރިކޮށް ވެސް މަސައްކަތް ކުރަމުން އަންނަ ކަމަށް ފޮރިން މިނިސްޓްރީން ވަނީ ބުނެފަ އެވެ.

ރައްކާތެރިކަމުގެ ފިޔަވަޅެއްގެ ގޮތުން މި ސަރަހައްދުގައި ތިބި ހުރިހާ ދިވެހިން ސަމާލުވެ، ލޯކަލް އެޑްވައިޒަރީތަކަށް ބޯލެނބުމަށާއި އެމްބަސީއާ ގުޅުމަށް ސަރުކާރުން އަންނަނީ އިލްތިމާސް ކުރަމުންނެވެ. އަދި އެހީތެރިކަން ބޭނުންވާ ފަރާތްތަކަށް އެމަރޖެންސީ ކޮންޓެކްޓް ނަންބަރުތައް ވެސް މިނިސްޓްރީން ވަނީ ނެރެފައެވެ.

- ތައިލެންޑްގައި ހުންނަ ރާއްޖޭގެ އެމްބަސީ ހޮޓްލައިން: 66611766502+

- ދިވެހިރާއްޖޭގެ ފޮރިން މިނިސްޓްރީގެ ހޮޓްލައިން:9607983400+

އަދި ހާލުގައި ޖެހިފައިވާ ސަރަހައްދުތަކުގައި ދިރިއުޅޭ ހުރިހާ ދިވެހިންގެ ސަލާމަތާއި ރައްކާތެރިކަން ކަށަވަރުކުރުމަށް އެ މިނިސްޓްރީގެ ޑިޕްލޮމެޓިކް މިޝަންތަކާ ގުޅިގެން ގިނަ މަސައްކަތްތަކެއް ކުރަމުން އަންނަ ކަމަށެވެ. ހޮނިހިރު ދުވަހުގެ މެންދުރުގެ ނިޔަލަށް އިތުރު ހާދިސާއެއް ނުވަތަ ކުއްލި ހާލަތެއް ދިމާވެފައެއް ނުވެއެވެ.

އިއްޔެ މިޔަންމާގެ މަންޑަލޭ ކައިރިއަށް އައި 7.7 މެގްނިޓިއުޑްގެ ބާރުގަދަ ބިންހެލުމުގައި މިޔަންމާ އާއި ތައިލެންޑަށް ބޮޑެތި ގެއްލުންތަކެއް ލިބިފައިވާއިރު މިޔަންމާގައި 140 އަށް ވުރެ ގިނަ މީހުން އަދި ބެންކޮކްގައި ހަ މީހަކު ވަނީ މަރުވެފަ އެވެ. މި ބިންހެލުމުގައި އިމާރާތްތަކާއި، މަގުތަކާއި، ބްރިޖްތަކާއި، ޑޭމެއް ވެސް ހަލާކުވެ 730 އަށް ވުރެ ގިނަ މީހުން ޒަޚަމްވެ، ހަމަނުޖެހުންތަކުގެ ތެރޭގައި މީހުން ސަލާމަތް ކުރުމުގެ އަވަސް އޮޕަރޭޝަންތައް ވަނީ ފަށައިފަ އެވެ.

އަވަށްޓެރި ތައިލެންޑްގައި ބިންހެލުމުގެ ސަބަބުން ވެރިރަށް ބެންކޮކްގައި ހަދަމުން ދިޔަ 33 ބުރީގެ އިމާރާތެއް ވެއްޓި އެތައް ބަޔަކު ޒަހަމްވެ 100 އަށް ވުރެ ގިނަ މީހުން ވަނީ ގެއްލިފަ އެވެ. އިންޒާރެއްނެތި އައި ބިންހެލުމާއި، އޭގެ ބާރުގަދަ އާފްޓާޝޮކްތައް ދެ ގައުމަށް ވެސް އިހުސާސްކުރެވުމާ ގުޅިގެން، ކުއްލި ނުރައްކަލުގެ ހާލަތާއި ބައިނަލްއަގުވާމީ ރެސްކިއު ގެ އެހީތެރިކަން ވަނީ ލިބިފަ އެވެ.