3 ރަށެއްގައި ރީހެބިލިޓޭޝަން ސެންޓަރު އެޅުމުގެ މަސައްކަތް ރޯޑް ޑިވެލޮޕްމަންޓް ކޯޕަރޭޝަން، އާރުޑީސީއާ ހަވާލުކޮށްފިއެވެ.
މިގޮތުން، ނ. ވެލިދޫ، ކ. ކާށިދޫގެ އިތުރުން ލ. ގަމުގައި ރީހެބިލިޓޭޝަން ސެންޓަރު އެޅުމަށް ނެޝަނަލް ޑްރަގް އެޖެންސީ، އެންޑީއޭއާއި އާރުޑީސީއާ ދެމެދުމިއަދުވަނީ އެއްބަސްވުމެއްގައި ސޮއިކުރައްވާފައެވެ. މި އެއްބަސްވުމުގައި އެންޑީއޭގެ ފަރާތުން ސޮއިކުރެއްވީ އެކްޓިން ސީއީއޯ މުޙައްމަދު ރާޝިދެވެ. އާރުޑީސީގެފަރާތުން ސޮއިކުރެއްވީ މެނޭޖިންގ ޑިރެކްޓަރ ބްރިގޭޑިއަރ ޖެނެރަލް ރިޓަޔަރޑް ޢަލީ ޒުހައިރެވެ.
އިތުރު ރަށްތަކުގައި ރީހެބިލިޓޭޝަން ސެންޓަރުތައް އެޅުމުގެ މަޤްސަދު ކިޔާދެއްވަމުން އެންޑީއޭގެ އެކްޓިން ސީއީއޯ މުޙައްމަދު ރާޝިދު ވިދާޅުވީ އިތުރު ސެންޓަރުތައް ރާއްޖޭގެ ރަށްތަކުގައި ޤާއިމުކުރެވުމުން އަތޮޅުތަކުން މީހުން މާލެ ނައިސް ފަރުވާ ހޯދުމުގެ ފުރުޞަތުވެސް ފަހިވެގެން ދާނެކަމަށެވެ. އަދި މީގެ ސަބަބުން މަސްތުވާތަކެތިން އަރައިގަތުމަށްދެވޭ ފަރުވާގެ ފުރުޞަތު ވެސް ގިނަ ބަޔަކަށް ލިބުމުގެ ފުރުޞަތު ފަހިވާނެ ކަަމަށް މުޙައްމަދު ރަޝީދު ވަނީ ފާހަގަކުރައްވާފައެވެ.
އެންޑީއޭއިން ވިދާޅުވީ ފަރުވާދޭ މަރުކަޒުތައް އެޅުމަށް ނ. ވެލިދޫން މިހާރު ބިމެއް ހަމަޖެހިފައިވާ ކަމަށެވެ. އަދި ބާކީ އޮތް 2 ރަށުން ބިން ހަމަޖެއްސުމުގެމަސައްކަތް ކުރަމުން އަންނަކަމަށެވެ.
ރާއްޖޭގައި ޖުމްލަ 6 ޑްރަގް ރީހެބިލިޓޭޝަން ސެންޓަރު ހުރެއެެވެ. އެންޑީއޭއިން މިހާރު ދަނީ ކ.ހިންމަފުށީގައި ހުންނަ ރީހެބިލިޓޭޝަން ސެންޓަރުގައި ހާއްސައެހީއަށް ބޭނުންވާ ކުދިންނަށް ފަރުވާ ދެވޭނެހެން 500 މީހުންނަށް ފަރުވާދެވޭނެ ޖާގަ އިތުރުކުރުމުގެ މަސައްކަތް ވެސް ފަށާފައެވެ. އަދި މުސްތަޤުބަކުގައި1000 މީހުންނަށް ފަރުވާ ދެވޭނެ ގޮތަށް މި ސެންޓަރުގެ ޖާގަ އިތުރު ކުރުމަށް ނިންމާފައިވާކަމަށް ވެސް އެންޑީއޭއިން ވަނީ ބުނެފައެވެ.
ފޮނުވާ