ފަލަސްތީނުގެ ރައްޔިތުންނާ އެއްބައިވަންތަކަން ދައްކުވައިދިނުމުގެ ގޮތުން ޣައްޒާގައި ތިބި ކުޑަކުދިންނަށް އެހީވުމަށް މިއަހަރުގެ ފިތުރު ޒަކާތު ފަންޑުން ފަސް ލައްކަ ރުފިޔާ ހަދިޔާކުރަން ނިންމާފައިވާ ކަމަށް ދިވެހި ސަރުކާރުން ބުނެފިއެވެ.

Advertisement

Advertisement

ސޯޝަލް މީޑިއާގައި މިކަން ހާމަކުރެއްވަމުން އިސްލާމިކް މިނިސްޓަރު ޑރ. މުހައްމަދު ޝަހީމް އަލީ ސައީދު ވިދާޅުވީ އެ ފައިސާ ބޭނުންކުރާނީ ޣައްޒާގައި ހިނގަމުންދާ ހަމަނުޖެހުންތަކުގެ ސަބަބުން ހާލުގައި ޖެހިފައިވާ ކުދިންނަށް ކާބޯތަކެއްޗާއި އަސާސީ ބޭނުންތައް ފޯރުކޮށްދިނުމަށް ކަމަށެވެ. 

ރާއްޖޭގެ ފަގީރުކަމުގެ ދަރަޖައިގެ ދަށުގައި ދިރިއުޅޭ 2،765 ފަރާތްތަކަށް މިއަހަރު ފަރާތަކަށް 4،500 ރުފިޔާ ބަހާ، 12.4 މިލިއަން ރުފިޔާ ފިތުރު ޒަކާތުގެ ގޮތުގައި ބަހާފައި ވެއެވެ. މީގެ އިތުރުން މާލެ ސަރަހައްދުން ދަނޑުވެރިކަމުގެ ޒަކާތް ލިބޭ ފަރާތްތަކަށް 15 ކިލޯގެ ކާބޯތަކެތި ވަނީ ދީފައެވެ.

މިނިސްޓަރު ޝަހީމް ވިދާޅުވީ އެހެން އަހަރުތަކާ ހިލާފަށް ސަރުކާރުން މިހާރު މުޅި ރާއްޖެއަށް ޒަކާތް ބެހުމުގެ މިންގަނޑު ތައް ކަނޑައަޅައި، ހުރިހާ ސަރަޙައްދަކާ މެދު ވެސް ހަމަހަމަކަމާއެކު އަމަލުކުރަމުން އަންނަ ކަމަށެވެ. މީގެ ކުރިން ބައެއް ރަށްރަށުގައި ލޯކަލް ކަލެކްޝަން އާއި ބެހުމުގެ ސަބަބުން އެހެން ރަށްރަށަށް ވުރެ ބޮޑު ފިތުރު ޒަކާތް ލިބުނެވެ.

"ފިތުރު ޒަކާތް ބެހުމުގައި މުޅި ގައުމު އެއް މުޖުތަމައެއްގެ ގޮތުގައި ބަލަން ޖެހޭ،" އިންސާފުވެރިކަމާއި އިޖުތިމާއީ އެއްބައިވަންތަކަން ގާއިމުކުރުމަށް ސަރުކާރުން ކުރަމުންދާ މަސައްކަތްތަކަށް އަލިއަޅުއްވާލައްވަމުން މިނިސްޓަރު ވިދާޅުވި އެވެ.