އެމްޓީސީސީން ނެރެފައިވާ ބަޔާނެއްގައި ބުނެފައިވަނީ، ދަތުރުފަތުރުގެ ނިޒާމް އިތުރަށް ހަރުދަނާކޮށް، ދަތުރުކުރައްވާ ފަރާތްތަކަށް އިތުރު ފުރިހަމަކަމާއެކު އެ ޚިދުމަތް ދިނުމުގެ މަޤަްދުގައި، އެކުންފުނީގެ ފެރީ ޚިދުމަތް ކުޑަގިރިއަށް ތަޢާރަފްކުރަން ނިންމާފައިވާކަމަށެވެ. އެމްޓީސީސީން މި ދަތުރުތައް ފަށާފައިވަނީ ފިތުރު ޢީދު ދުވަހާއި ގުޅިގެން މިއަދު ހެނދުނު 09:00 ގައެވެ.

އަލަށް ތަޢާރަފްކުރި މި ޚިދުމަތާއި ގުޅިގެން އެމްޓީސީސީން އިތުރަށް ވިދާޅުވެފައިވަނީ، މި ދަތުރުތައް ހަމަޖެހިފައިވަނީ، ހަފުތާގެ ހުކުރު އަދި ހޮނިހިރު ދުވަސްތަކުގައި މާލޭގެ ހެންވޭރު ފެރީ ޓާމިނަލް އިން ކުޑަގިރިއަށް ކަމަށެވެ. އަދި ކުޑަގިރިން މާލޭގެ ހެންވޭރު ފެރީ ޓާމިނަލް އަށް ވެސް ދަތުރުތައް ހަމަޖެހިފައިވާ ކަމަށް އެމްޓީސީސީއިން ވަނީ މަޢުލޫމާތު ދެއްވާފައެވެ.

އެމްޓީސީސިން އިތުރަށް ބުނެފައިވަނީ މި ދަތުރުތަކުގެ އަގެއްގެ ގޮތުގައި ހަމަޖައްސާފައިވަނީ ކޮޅަކަށް 70 ރުފިޔާކަމަށެވެ. އަދި 35 މިނިޓުގެ މިދަތުރުތަކަށް ހަމަޖައްސާފައިވަނީ އެ ކުންފުނީގެ އެއާކޮންޑިޝް ފެރީތަށް ކަމަށް ވެސް އެމްޓީސީސީން ވަނީ ބުނެފައެވެ.

ކުޑަގިރިއަށް ދަތުރުކުރަން ބޭނުންވާ ފަރާތްތަކަށް އެސްޓީއެލް އޮންލައިން ޕޯޓަލް (mv.mtcc.stl) މެދުވެރިކޮށް މިހާރު ޓިކެޓް ގަނެވޭނެކަމަށް ވެސް އެކުންފުނިން ވަނީ ބުނެފައެވެ.

އެމްޓީސީސީގެ މަޤުޞަދަކީ އެކަށީގެންވާ އަގެއްގައި ލުއިފަސޭހަކަމާއެކު ބޭނުންކުރެވޭ ކަނޑާއި އެއްގަމުގެ ދަތުރުފަތުރުގެ ޚިދުމަތް ރައްޔިތުންނަށް ފޯރުކޮށްދޭ ކުންފުންޏެއްގެ ގޮތުގައި ދެމިއޮތުން ކަމަށް އެ ކުންފުނިން ވަނީ ބުނެފައެވެ.