އެމްއެންޑިއެފް އިން ބުނެފައިވަނީ، 31 މާރިޗް އިން 1 އެޕްރީލް ވަނަ ދުވަހުގެ 16:00 އިން 18:00 ޖުމްހޫރީ މައިދާން ސަރަހައްދުގައި މި ހަރަކަތްތައް ކުރިއަށް ދާގޮތަށް ނިންމާފައިވާކަމަށެވެ. މިއީ ފިޠުރު ޢީދު ދުވަހާއި ދިމާކޮށް އެމްއެންޑީއެފް އިން އިސްނަގައިގެން، ސަރުކާރުގެ އިދާރާތްތައް ގުޅިގެން މާލޭގައި "ޢީދުހަވީރު 1446" ގެ ނަމުގައި ބާއްވާ ބޮޑު ޢީދު ހަވީރެކެވެ.

އިއްޔެ މާލޭގައި ބޭއްވި "ޢީދު ހަވީރަށް" ވަނީ ވަރަށް ބޮޑު ތަރުހީބެއް ލިބިފައެވެ. ގިނަ އަދަދެއްގެ ބަޔަކު ބައިވެރިވެފައިވާ މި ހަވީރުގައި ވަނީ ރާއްޖޭގެ އިހުގެ ސަޤާފަތާއި، އިހުގެ ދިވެހިން ކުޅެއުޅުނު ކުރިވަރުތަކުގެ އިތުރުން ޒަމާނީ ކެރެކްޓަރތައް ފިއުޝަންގޮތަށްވެސް ދައްކާލާފައިވެއެވެ.

މީގެއިތުރުން، އެކި އެކި ސްޓޯލްތަކުގައި އެކި އުމުރުފުރާގެ ކުދިންނަށް ބައިވެރިވެވޭގޮތަށް އެކި ތީމްތަކުގެ ކުޅިވަރު ހަރަކާތްތައް ވެސް ވަނީ ކުރިއަށް ގެންގޮސްފައެވެ. އަދި އެމްއެންޑީއެފް އަދި ޕޮލިހުންގެ ޔުނިފޯމާއި އުޅަނދުތަކާއި އެކު ފޮޓޯ ނެގުމުގެ ފުރުސަތުވެސް މި ހަރަކާތުގައި ލިބިގެންދެއެވެ.

އިއްޔެ ކުރިއަށް ދިޔަ ޢިދު ހަވީރުގައި ރައީސުލްޖުމްހޫރިއްޔާ ޑރ.މުޙައްމަދު މުއިއްޒުއާއި އެމަނިކުފާނުގެ އަނބިކަބަލުންވެސް ވަނީ ބައިވެރިވެ ކުދިންނާއި އެކުދިންގެ އާއިލާތަކާއި އެކު ފޮޓޯ ނެގުމާއި ސަލާމްކުރެއްވުމުގައި ވަގުތު ހޭދަކުރައްވާފައެވެ.