ޕީއެސްއެމް ނިއުސްގެ ރާއްޖެމިއަދު ޕްރޮގްރާމްގައި ވާހަކަދައްކަވަމުން ދާޚިލީ ސަލާމަތާއި ފަންނިއްޔާތާ ބެހޭ ވުޒާރާގެ ސްޓޭޓް މިނިސްޓަރ އަލްއުސްތާޛް އަޙްމަދު ސިއްދީޤު ވިދާޅުވެފައިވަނީ، ދ. ވާނީގައި ހެދުމަށް ނިންމާފައިވާ "ހޯޕް އައިލެންޑް" މިހާރު ގިރާވަރު އުތުރު ފަޅު ހިއްކުމަށް ފަހު އެތަނަށް ބަދަލުކުރުމަށް ނިންމާފައިވާ ކަމަށެވެ. ސިއްދީޤު އިތުރަށް ވިދާޅުވީ، މާލެ ކައިރިތަނެއްގައި މިތަން ހެދުމަށް ނިންމާފައިވަނީ ދ.ވާނީގައި އެތަން ތަރައްޤީކޮށްފިނަމަ ދަތުރުފަތުރުގެ އިތުރުންވެސް ޚަރަދުގެ ގޮތުން ގިނަ ގޮންޖެހުންތަކެއް ކުރިމަތިވާނެތީކަމަށެވެ.

700 މީހުންގެ ޖާގައާއި އެކު ތަރައްގީކުރާ މި ތަނުގައި ކުށުގެ ވެއްޓަށް ހުށަހެޅޭ ކުދިންނަށް ފަރުވާ ފޯރުކޮށްދިނުމުގެ އިންތިޒާމު ހަމަޖެހިފައިވާނެކަމަށް ސިއްދީޤުވަނީ ވިދާޅުވެފައެވެ. އަދި ތަޢުލީމާއި ކުޅިވަރުގެ އިތުރުން ސިއްހީ ހިދުމަތް ވެސް އެތަނުން ލިބޭނެކަމަށް ސިއްދީޤުވަނީ ފާހަގަކުރައްވާފައެވެ. 

ކުށަށް އަރައިގަތުމުގެ ނުރައްކަލުގައިވާ ކުދިންނަށް ބޭނުންވާ ފަރުވާ ފޯރުކޮށްދިނުމަށާއި އިޞްލާޙީ އަދި ރީހެބިލިޓޭޝަން ޕްރޮގްރާމްތައް ހިންގުމަށްޓަކައި ޤާއިމުކުރުމަށް ހަމަޖެހިފައިވާ "އުއްމީދު ނުވަތަ ހޯޕް އައިލެންޑް" މަޝްރޫޢަށް ބޭނުންވާ 15 ހެކްޓަރުގެ ބިން، ގިރާވަރު އުތުރުފަޅުން ހިއްކުމަށް ވަނީ ނިންމާފައެވެ. އަދި "ސެންޓްރަލް ޕްރިޒަން ކޮމްޕްލެކްސް" މަޝްރޫޢަށް ބޭނުންވާ 30 ހެކްޓަރުގެ ބިން ހިއްކައި، "ސެންޓްރަލް ޕްރިޒަން ކޮމްޕްލެކްސް" ތަރައްޤީކުރުމަށްވެސް ވަނީ ނިންމަވާފައެވެ.

މިތަނަށްދާ ކުދިންނަށް އުމުރުން 18 އަހަރު ވަންދެން އެތަނުގައި ތިބެވޭނެކަމަށާއި، އޭގެ ފަހުން ފުލުހުންނަށް ނުވަތަ ސިފައިންނަށް ވަކި މުއްދަތަކަށް ޚިދުމަތްކުރަން ޖެހޭނެކަމަށް ވެސް ދާޚިލީ ސަލާމަތާއި ފަންނިއްޔާތާ ބެހޭ ވުޒާރާއިން ވަނީ ބުނެފައެވެ.