އިންދިރާ ގާންދީ މެމޯރިއަލް ހޮސްޕިޓަލް، އައިޖީއެމްއެޗް ގެ އައިސީޔޫގައި ފަރުވާދެމުން ދަނިކޮށް އަންހެން މީހާ ނިޔާވެފައިވަނީ މިރޭ 19:17 ހާއިރުކަމަށް މަޢުލޫމާތު ލިބެއެވެ. އަދި މިހާދިސާގައި ފިހުނު ފިރިހެން މީހާއަށް އަދިވެސް ދަނީ އައިޖީއެމްއެޗް ގެ އައިސީޔޫގައި ފަރުވާދެމުންނެވެ.

މި މަހު 24 ވަނަ ދުވަހު ރަސްދޫ ގެއްގެ ކޮަޓަރިތެރޭގައި ރޯވެފައިވާ އަލިފާންނުގެ ސަބަބުން އަނިޔާވެފައިވަނީ އުމުރުން 31 އަހަރުގެ ދެމަފިރިއަކަށެވެ. މި ދެމީހުންގެ ހަށިގަނޑުގެ 70-80 އިންސައްތަ ފިހިފައިވާކަމަށް އައިޖީއެމްއެޗް އިން ވަނީ މަޢޫލޫމާތު ދެއްވާފައެވެ.

މި ދެމީހުންނަށް ފަރުވާދިނުމަށްޓަކައި ބޭރުގެ "ބާން ސްޕެޝަލިސްޓުން" ގެ ދެ ބޭފުޅަކު ވެސް ވަނީ ރައްޖެއައިސްފައެވެ. މި ހާދިސާގައި ފިހުނު އަންހެން މީހާ މިއަދު ނިޔާވެފައިވާއިރު، އެދެމީހުން ފިހިފައިވާ މިންވަރު ބޮޑުކަމުން އައިޖީއެމްއެޗް ގެ ޑޮކްޓާރުން ވަނީ ދެމީހުންގެ ފުރާނަ ސަލާމަތް ކުރެވޭނެ ކަމުގެ އުންމީދުވެސް ކަނޑާލާފައެވެ.

މި ހާދިސާގައި އަނިޔާވި ފިރިހެން މީހާއަށް އަދިވެސް އައިސީޔޫގައި ވެންޓިލޭޓަރުގައި ފަރުވާ ދެނުންދާއިރު އެމީހާގެ ހާލުވެސް ވަރަށް ސީރިއަށް ކަމަށް އައިޖީއެމްއެޗް އިން ވަނީ ބުނެފައެވެ.

މި އަލިފާނުގެ ހާދިސާ ހިނގަން މެދުވެރިވި ސަބަބު އަދި އެއްވެސް ފަރާތަކުން ހާމަކޮށްފައެއް ނުވެއެވެ. އެހެންނަމަވެސް، މިހާދިސާ ތަހުގީގްކުރަމުން އަންނަކަމަށް ފުލުހުން ވިދާޅުވިއެވެ.