ޝަހީމް ސޯޝަލް މީޑިއާގައި ކުރެއްވި ޕޯސްޓެއްގައި ވިދާޅުވީ މިސްކިތް ކައިރީގައި އެހެން މިސްކިތްތަކާއި މީހުން ދިރިއުޅޭ ގެތައް ހުރިނަމަ ތާޅަފިލީގެ އަޑު ކޮންޓްރޯލް ކުރުމަކީ މުހިންމުކަމެއް ކަމަށެވެ. އަދި އެއް ބަޔަކު އަނެއް ބަޔަކަށް ގުރުއާން ކިޔެވުމުގައި އަޑު އުފުލުމަކީ ނަހީކުރައްވާފައިވާ ކަމެއްކަމަށްވެސް އޭނާ ވިދާޅުވިއެވެ. 

’އެއް ބަޔަކު އަނެއް ބަޔަކަށް ގުރުއާން ކިޔެވުމުގައި އަޑު އުފުލާ އުނދަގޫވާ ގޮތް ހެދުމަކީ ހަދީސްގައި ނަހީކުރެވިގެންވާ ކަމެއް.‘ 

އެހެންނަމަވެސް ނަމާދު ވަގުތު އިއުލާނުކުރުމަށް ތާޅަފިލީގެ އަޑު އެކަށީގެންވާ މިންވަރެއްގައި ބަހައްޓަންޖެހޭނެކަމަށްވެސް ޝަހީމް ވިދާޅުވިއެވެ. 

މިސްކިތްތަކުގައި އިމާމުން ފިގުހުވެރިވުމަކީ މުހިންމު ކަމެއްކަން ފާހަގަ ކުރައްވާ ޝަހީމްގެ ޕޯސްޓުގައި ވިދާޅުވެފައިވަނި ޖަމާއަތުގައި ނަމާދުކުރުމުގައި ވިސްނަންޖެހޭ މުހިންމު ކަންތައްތަކެއް ހިމެނޭކަމަށެވެ. އަދި އޭގެ ތެރޭގައި ޖަމާއަތް ބޮޑުވި ވަރަކަށް ކިޔެވުން ކުރުކުރުމާއި ކުޑަކުދިން ރޯ އަޑު އިވިއްޖެނަމަ ނަމާދު އަވަސްކުރުން ހިމެނޭކަމަށެވެ.