ސިޓީ ކައުންސިލުން ކުރި އިއުލާނެއްގައި ބުނީ މިއަދުން ފެށިގެން އޭޕްރިލް 15 ވަނަ ދުވަހުގެ ނިޔަލަށް ޝަކުވާ ހުށަހެޅުމަށް ކައުންސިލުން އެހީތެރިވާނެކަމަށެވެ. އަދި އެކަން މަގުފަހި ކުރުމުގެ ގޮތުން ސިޓީ ކައުންސިލްގެ އާންމު ހިދުމަތްތަކާ ބެހޭ ބައި އޭޕްރިލް 5 ވަނަ ދުވަހާ ހަމައަށް ކޮންމެ ދުވަހަކުވެސް ހުޅުވާނެކަމަށެވެ. އެދަުވަސްތަކުގައި ހެނދުނު 10:00 އިން މެންދުރު 2:30 އަށް އަދި ރޭގަނޑު 9:30 އިން 11:00 އަށް ހިދުމަތް ދޭނެއެވެ. 

އަދި އޭޕްރިލް 6 ވަނަ ދުވަހުން ފެށިގެން 15 ވަނަ ދުވަހާ ހަމައަށް ހެނދުނު 9:00 އިން ހަވީރު 4:00 އަށް އަދި ރޭގަނޑު 9:00 އިން 11:00 އަށް ހިދުމަތް ދޭނެއެވެ. 

ގެދޮރުވެރިޔާ ސްކީމުގެ ދަށުން ފްލެޓް ލިބޭ 4000 މީހުންގެ ލިސްޓެއް ފުރަތަމަ އާންމު ކުރީ ނިމިދިޔަ ސަރުކާރުންނެވެ. އެއަށްފަހު އެ ލިސްޓުގައި ގިނަ މައްސަލަތަކެއް ފާޙަގަކުރެވި އެންޓި ކޮރަޕްޝަން ކޮމިޝަނުން މައްސަލަ ބެލުމަށްފަހު އަލުން ލިސްޓް ރިވިއުކުރަން ވަނީ ނިންމާފައެވެ. މި ސަރުކާރުން ފްލެޓް ލިބޭކަމަށް ނިންމާ އާންމުކުރި ލިސްޓުން ވަނީ ކުރިން ނެރުނު ލިސްޓުގައި ހިމެނުނު 3119 މީހުން އުނިކޮށްފައެވެ. 

ފްލެޓް ލިސްޓަށް ގިނަ ބަޔަކު ޝަކުވާ ހުށަހަޅަމުންދާއިރު އެކަމުގެ އިންތިޒާމުތަކާ މެދު ހިތްހަމަ ނުޖެހި ހައުސިން މިނިސްޓްރީއަށް ގޮސް އާންމުން ވަނީ މުޒާހަރާކޮށްފައެވެ.