މިއަންމާ ސަރުކާރުން އާންމުކުރި މައުލޫމާތުގައި ބުނެފައިވަނީ މިއަދާ ހަމައަށް 2،056 މީހަކު މަރުވިކަން ކަށަވަރުކުރެވިފައިވާކަމަށެވެ. އަދި 3،900 މީހުން ބިންހެލުމުގެ ސަބަބުން ޒަހަމްވެފައިވާކަމަށެވެ. މީގެ އިތުރުން ބިންހެލުމަށްފަހު ވީނުވީއެއް ނޭނގި 270 މީހުން ގެއްލިފައިވާކަމަށްވެސް މިއަންމާ ސަރުކާރުން ބުނެއެވެ. 

މިއަންމާގެ މަގުތަކާއި އުމްރާނީ ވަސީލަތްތަކަށް ވަރަށް ބޮޑަށް ގެއްލުންވެފައިވުމުން މީހުން ހޯދުމާއިި ސަލާމަތް ކުރުމުގެ މަސައްކަތައް ވަނީ ބުރޫއަރާފައެވެ. ގިނަ ހޮސްޕިޓަލުތައް ހަލާކުވެފައިވާތީ ހުސް ބިންތަކުގައި ސިއްހީ ފަރުވާ ދިނުމުގެ އިންތިޒާމު ހަމަޖައްސާ މީހުންނަށް ފަރުވާ ދެމުން އަންނަނީ އެތަންތަނުގައެވެ. 

މި ބިންހެލުމުގެ އަސަރު އަވައްޓެރި ތައިލެންޑަށްވެސް ކުރިއެވެ. ތައިލެންޑުގައި ހަދަމުންދިޔަ 30 ބުރީގެ އިމާރާތެއް ބިންހެލުމުގައި ވެއްޓި 19 މީހަކު މަރުވިއެވެ. އަދި އެތަނުގައި މަސައްކަތް ކުރަމުންދިޔަ މީހުންގެ ތެރެއިން 75 މީހަކު އަދިވެސް ނުފެންނަކަމަށް ތައިލެންޑުގެ އޮފިޝަލުން ބުނެއެވެ.