މި މައްސަލައާއި ގުޅިގެން އާސަންދަ ކުންފުނީގެ މެނޭޖިންގ ޑިރެކްޓަރ އާމިނަތު ޒީނިޔާ ވިދާޅުވީ، ލަންކާ ހޮސްޕިޓަލުން ފަރުވާ ހޯދާ ފަރާތްތަކަށް އާސަންދައިގެ ޚިދުމަތް މިވަގުތު މެދުކެނޑިފައިވާކަމަށާއި، މި މައްސަލައަށް ހައްލެއް ހޯދުމަށް މަސައްކަތްކުރަމުންދާކަމަށެވެ. އެގޮތުން މިހާރުވެސް މާލީ ވުޒާރާއާއެކު މަސައްކަތް ކުރައްވަމުން ގެންދަވާކަމަށް ޒީނިއާ ވަނީ ވިދާޅުވެފައެވެ.

އާސަންދައިން ބުނެފައިވަނީ މި ޚިދުމަތް މެދުކެނޑިފައިވަނީ އެ ހޮސްޕިޓަލުން ކްރެޑިޓް އުސޫލުން ޚިދުމަތްދިނުން ހުއްޓާލުމާ ގުޅިގެން ކަމަށެވެ. ލަންކާ ހޮސްޕިޓަލަކީ ލަންކާގައި ދިރިއުޅޭ އަދި ބޭސްފަރުވާ އަށް ލަންކާއަށްދާ ދިވެހިން އެންމެ ގިނައިން ބޭސްފަރުވާގެ ޚިދުމަތް ހޯދުމަށް ދާ އެއް ހޮސްޕިޓަލް ކަމުގައިވާއިރު އެ ހޮސްޕިޓަލުން އާސަންދައިގެ ހިދުމަތް ނުލިބޭ މައްސަލަ ހައްލު ކުރެވޭނެ މުއްދަތު ކަށަވަރުކޮށް ބުނަން ނޭންގޭކަމަށް ވެސް އާސަންދައިން ވަނީ ބުނެފައެވެ.

އާސަންދަ ސްކީމްގެ ދަށުން ރާއްޖެއިން ބޭރަށް ބޭސްފަރުވާއަށް މިވަގުތު ފޮނުވަމުންދަނީ އިންޑިއާ އަދި ސްރީލަންކާއަށެވެ. މީގެ ތެރެއިން ލަންކާ ހޮސްޕިޓަލުން އާސަންދަ ދިނުން މެދުކަނޑާލާއފައިވާއިރު، މީގެ ކުރިން އިންޑިއާގެ މަނިޕާލް ހޮސްޕިޓަލުންވެސް އާސަންދަ ޚިދުމަތް ދިނުން ވަނީ ހުއްޓާލާފައެވެ. އެކަާއި ގުޅިގެން އޭރު އާސަންދައިން ބުނެފައިވަނީ އިންޑިއާގެ މަނިޕާލް ހޮސްޕިޓަލާ އެކު އޭރު އެއްބަސްވެފައިވާ އަގުތައް އެ ކުންފުނިން މުރާޖައާ ކުރަމުންދާތީވެ، އާސަންދަ ސްކީމުގެ ދަށުން އެ ހޮސްޕިޓަލަށް ބަލިމީހުން ފޮނުވުން މިވަގުތަށް ހުއްޓާލީ ކަމުގައެވެ.