ލިވަޕޫލްގެ ހޯމް ސްޓޭޑިއަމް، އެންފީލްޑްގައި މި ކެމްޕޭން އިފްތިތާހުކޮށްދެއްވީ ރައީސް ޑރ. މުހައްމަދު މުއިއްޒުގެ ހާޒިރުގަ އެވެ. މި މަސައްކަތުގެ ސަބަބުން ރާއްޖޭގެ ބައިނަލްއަޤްވާމީ ވިޒިބިލިޓީ ވަރަށް ބޮޑަށް އިތުރުވެ، ރާއްޖެއަށް ޒިޔާރަތްކުރާ ފަތުރުވެރިންގެ އަދަދު އިތުރުވެގެންދާނެ ކަމަށް ބެލެވެއެވެ.

މި ޕާޓްނަރޝިޕްގެ ދަށުން ލިވަޕޫލް އެފްސީގެ އެކި ޕްލެޓްފޯމްތަކުގައި ރާއްޖޭގެ ފަތުރުވެރިކަން އިޝްތިހާރުކުރުން ހިމެނެއެވެ. އޭގެ ތެރޭގައި ޕްރިމިއާ ލީގުގެ ހޯމް މެޗުތަކުގައި އެލްއީޑީ ޑިސްޕްލޭ ޕެނަލްތަކާއި ރަސްމީ ކްލަބް ޕަބްލިކޭޝަންތަކުގައި ހިމެނޭ ފީޗާތަކާއި ލިވަޕޫލް އެފްސީގެ ސޯޝަލް މީޑިއާ ޗެނަލްތަކުގައި ޕްރޮމޯޝަނަލް ކޮންޓެންޓް ހިމެނެ އެވެ. އެ ކްލަބުން ބުނީ ޑިޖިޓަލް ޕްލެޓްފޯމްތަކުގައި އެލްއެފްސީގެ ފޮލޯވަރުންގެ އަދަދު 53 މިލިއަނަށް ވުރެ ގިނަ ކަމަށާއި ކޮންމެ ސީޒަނެއްގައި ވެސް 211 މިލިއަނަށް ވުރެ ގިނަ ބެލުންތެރިން ޒިޔާރަތްކުރާ ކަމަށެވެ.

މި ކެމްޕެއިންގައި ސްޓޭޑިއަމާއި ޑިޖިޓަލް ޕްރޮމޯޝަންގެ އިތުރުން އިނގިރޭސިވިލާތުގެ އެކި ކަންކޮޅުތަކުގައި ޓެކްސީތަކާއި ބަހުގައި ރާއްޖޭގެ ތީމްގެ ބްރޭންޑިންތައް ފެނިގެންދާނެ އެވެ. އަދި ޔޫރަޕްގެ މާކެޓްތަކަށް އަމާޒުކޮށްގެން ހަދާފައިވާ ބިލްބޯޑުތަކުން ވެސް މަންޒިލް ދައްކާލާނެ އެވެ.

ލިވަޕޫލްގެ ކުޅުންތެރިންނާއެކު ހިންގާ ހަރަކާތްތަކާއި ރާއްޖޭގައި ލިވަޕޫލް ފުޓްބޯޅަ އެކަޑަމީއެއް ގާއިމުކުރުމަކީ ވެސް ކުޅިވަރު ޓޫރިޒަމަށް އެހީތެރިވުމުގެ މަގްސަދުގައި ހަދާފައިވާ އެއްބަސްވުމެކެވެ.

މޯލްޑިވްސް މާކެޓިން އެންޑް ޕަބްލިކް ރިލޭޝަންސް ކޯޕަރޭޝަން (އެމްއެމްޕީއާރުސީ) އިން ލަފާކުރާ ގޮތުގައި މި ކެމްޕެއިންގެ ސަބަބުން ރާއްޖެއަށް އަލަށް އެއް ލައްކަ ޓޫރިސްޓުން އަންނާނެ އެވެ. މި މަސައްކަތުގައި 2.5 މިލިއަން ޑޮލަރުގެ އިންވެސްޓްމަންޓެއް ހިމެނޭއިރު، ގާތްގަނޑަކަށް 200 މިލިއަން ޑޮލަރުގެ އާމްދަނީއެއް ލިބޭނެ ކަމަށް ވަނީ ލަފާކޮށްފަ އެވެ.

މި ދަތުރުފުޅުގައި ރައީސް މުއިއްޒު ލިވަޕޫލް އެކަޑަމީގެ އިސްވެރިންނާ ބައްދަލުކުރައްވައި ޖޮއިންޓް މާކެޓިން ހަރަކާތްތަކާއި ކުރިއަށް އޮތް ތަނުގައި ގުޅުން ބަދަހިކުރުމާ ބެހޭ ގޮތުން މަޝްވަރާ ކުރައްވާނެ ކަމަށް ބެލެވެ އެވެ.

އޮފިޝަލުން ވިދާޅުވީ މި ކެމްޕެއިންގެ ސަބަބުން ފަތުރުވެރިކަން ހަރުދަނާކޮށް އިގްތިސާދީ ގޮތުން ފުޅާ ދާއިރާއެއްގައި ކުރިއެރުމަށް އެހީތެރިވެދީ ރާއްޖެއަށް ފައިދާކުރާނެ ކަމަށެވެ.